بدع و جواب هاني دعكيك و محمد باصيص

مساجله جمعتني مع اخي الشاعر محمد سالم باصيص ابو عمر
بديناها على فصل قديم لي سبق و ان نشرته و بعد ذلك حصل
بيننا بدع و جواب في مساجله وديه بين اخوين

نرجـــوا ان تنـــال اعجــــابكم و رضـــاكـم :

هاني دعكــــيك :
........................

قال بن دعكيـــك نا ذقــت الخيـــانـه مــن صحابي
بعـد ما قـد كنـــت نا الغـــالي و لا لي حــد مثــيل

ذقتــها و اليـــوم حطــوا لي الصــبر داخـل شرابي
و العســل عفتـه و غيري بي شرب من سلسبيل

كننا في مـا حصـــل ذلحـــين باراجـــع حســــابي
في صحـابـي كلـــهم قبــل المعلـــم و القبيـــــل
~~~~~~~~~~~~~~~~~~~~~~~~~~~~

محمد باصـــيص :
........................

قال بــن باصيـــص ع ذا البــدع باســـوي جـــوابي
و لاجـــل كل حجــه لهــا مرسـام من الزام الدويل

و الذي يديـر الفكـــر بالعقـــل بايحـــوك الجـــوابي
و المحبه بالرضــى مـا تجـــي محبــه بالصميــــل

ومـن سمع بالعبد لي هو قد مشاء خلف السرابي
مــن غبــاته يحســب انـه مــاء في ظهـــر المقيل
~~~~~~~~~~~~~~~~~~~~~~~~~~~~

هاني دعكـــــيك :
.........................

كـــل شـي واضــح و لا حــاجه تكــثر في عتــابي
لا تعــاتبنـي و نــا مــا بــا نعــــاتــب بــن عقيــــل

الخيــــانـه دمــرت حصــن الغـــويــزي و الحبـــابي
و انــت عـــادك مفتكــــر الفيـــل بـايـوكلــــه فيــل

ما نلـــوم العبــد لومــي ع الــذي ضيّـــع شبـــابي
يـوم حبيتـــه علــى شـــانـه لقيـــت المستحيــل
~~~~~~~~~~~~~~~~~~~~~~~~~~~~

محمد باصــــيص :
..........................

هكـذا طبـــع البشـــر دائـــم تـدوّر ع الخـــــــرابي
ما تصلح المبناء و لا تشمــر على الســـوم البتــيل

با نقول الصـــدق و صوت الصـــدق ما با يظل غابي
و الكذب خيبـــه امــا الصـــدق شف شــرعه طويل

زام لـ جداد قد عــداء و القـــرش مـــره و الربـــابي
و زام الهطــف يا صـــاحبي ايــضآ و قـــداح الفتــيل

ما بانلــوم العبــــد نـا بالـــوم لــي فـــك العقـــابي
و القـــى مشـــاعب واجــده توصلك لا حيد الجزيل

كلــمه من المـزيون تشفي لي جروحي و الصوابي
لا قــد نطق لبيـــه . تـوا تبريـــك يالقلــب العليـــل
~~~~~~~~~~~~~~~~~~~~~~~~~~~~

هاني دعكــــيك :
........................

صحيــــح ان الكـــذب خيبـــه يا محبـــين التـــرابي
لي هــو عبــر عمــره معــارض دوب ع خط السبيل

و اجــدادنـا من يــوم راحـــوا زاد ريشــك يالغــرابي
لك حق . دام الصقـــر اصبـــح يا مصـــوب يا قتــيل

و الي لقــى ذيـك المشاعب يالفتى داخل نصابي
قصــده يعــذبنــي يخلــي الدمــع ع خـدي يسيل

ارفق بقلبي يا كحيـــل الطــرف لبــي لــي طلابي
شفنــا عشقتك . يوم شفتك .في شبح اخر مديل
~~~~~~~~~~~~~~~~~~~~~~~~~~~~

محمد باصــــيص :
.........................

بانحـــوّل لا حنــت ارعـــوده و اعتكــر نوّ السحابي
و بانحمـد المولــى و له بنقـــول فضـــلك يا فضيل

بي زيــن موسمنـــا و لا قـــد حـان وقت يالصرابي
بعطيـــك من الربــه . و لا نبغـــاك تــذراء بالثقـــيل

ما با يضل يزحـف . و لا بي ضــل ياخـــوك حـــابي
الزقر بايكبـــر و با يدحـــق على اطــراف الـرجيـــل

و با يستلب بالشُـرف يوم الشُـرف زين الســـلابي
و فوقـهن ميـــزر مضلــع خــرج سـت عشـر طويل
~~~~~~~~~~~~~~~~~~~~~~~~~~~~

هاني دعكـــيك :
........................

ما دام ديع سيـل ع شذاب الــزبد بطـــرح نـــوابي
من شان تلقـي لي عســـل تصلــح هديه للخليل

و الـــزرع با يبــــذر و با نحـــط النواخــذ ع نقـــابي
لي عتمــــها صـافي كرع تسقي علوبي و النخيل

و الزقـــر با يكبـــر حقيـــقه با يفـــرت ع الشنــابي
ذا . ان . وقـــع رجال ما لبس جنز بو منظر جميــــل

و لا لبس من صنع طيحنـــــي و لا واحد يعـــــابي
ع لي تربـــاء هـاهنــاء . ما حـــل دوعن و السفيـل

و الشُـــــرف ما با تنتسي . ايضآ و دقلات الحـرابي
مع خرج ست عشر تخلي العقل من رأسي يميـل

يا بو عمـــر عـداء زمـن لي كنت هاوي في ركــابي
و اليــوم فــي غربتــك ذه . بعــت المره و الجميــل
~~~~~~~~~~~~~~~~~~~~~~~~~~~~

محمد باصــــيص :
.........................

لا قد امـــر ربــك بغيثــــه و انكثـب رؤس الشعابي
نا بافرح شفنا لـ وادي عمــــد قـــد صبــــح يسيل

و تتباشر الحرثان في عنــدل و يملي لـي الجوابي
و الناس به تسقي و تشـــرب و منه الـزايد غسيل

لكن قصدك بالعمــد . تبغـــى تعكـــر لــي شرابي
ذا و انت تعرفنــــا سـوى . ما نخـــلط الصافي بنيل

قد قلت لك الكذب خيبـه . و الصــدق طب السبابي
و الكـذب حجـــه زاحـــفه و الصــدق حيته ما يميل

يالــي تعرفــون الـوتاء . شفـهم يفخطـــون اللبابي
قــدها عـوايد من زمـــن الجيـــل بايتبــــــعه جيل

لكن خلفتوا لي الوتاء . رحتم تفخطون الكــــــرابي
خيل الكرابي ينكسـر . و لـ عاد تتمالـــح بخيـــــل

الهـــرج ماهـــو هكـذا يالـــي تكتبـــون الكتــــابي
مطلوب ترسم لي مربع رحت ترسم مستطيـــــل

و زقلت غطياني وقد كسرت في الصفحه كـــوابي
و صبيت لي شـــاهي حمـر و تحط فوقه جنــزبيل

و المقـــايد واجــده بـين النمـــاره و الـذيــــــــابي
و الدب . متعرض بغه نفسه مطالب في الدخيــــل

باقي على الناموس شفنا ما نفـــرط يالعـــــــرابي
و العز باقي بارضنا . و خل البكيــلي فـــي بكيــــل
~~~~~~~~~~~~~~~~~~~~~~~~~~~~

هاني سالمين دعكيك
محمد سالم باصيــص
17 / 07 / 2012 م